Marlou Absil verrich officiële äöpening; bezeukers loestere, óntdekke én sjpraeke häör eige dialek
VENLO – ‘t Limburgs Museum haet vriedaagmiddaag 10 juli Oet ’t Hert geäöpend, ‘n gratis toegankelike installatie euver de Limburgse taal in al häör dialekte. Mit ‘t nuje initiatief wilt ‘t museum laote zeen det ‘t Limburgs väöl meer is dan ‘n verzameling wäörd: ‘t is ‘n taal die verbónje is mit herinneringe, emoties en identiteit.
De officiële äöpening waerde verricht door Marlou Absil, veurzitter van ‘t Staotecomité Limburgse taal van de Provinciale Sjtaote. Same mit directeur Bert Mennings goof zie ‘t sjtartsein veur de installatie, die gratis te bezeuke is in de foyer van ‘t Limburgs Museum.
‘n Taal die se laefs
“Ómdet v’r bie de Provincie Limburg weite wie belangrijk dien modertaal is, zeen v’r heel blie mit dit initiatief van ‘t Limburgs Museum. Op dees meneer kinne nog meer miense, noe en in de toekóms, häör hert laote sjpraeke en blief ‘t Limburgs klinke,” zaet Marlou Absil, veurzitter Staotecomité Limburgse taal van de Provinciale Sjtaote.
Oet ’t Hert leut zeen det ‘t Limburgs juus klink op momente die doonbie kómme: aan de keuketaofel, in de kroeg, bie leefde, verdreet en alles daotössenin. Op de momente as ‘t hert sprik.
Perseunlike verhaole
In de installatie vertelle Limburgers häör perseunlike verhaol in häör eige dialek. Bezeukers kinne loestere nao radiofragmente oet versjillende dialekgebiede en häör kinnis teste bie ‘t Sjoolbord van de Limburgse Taal of zelf een boodsjap achterlaote in häör eige dialek. “Taal is emotie. Väöl Limburgers drökke häör geveules ‘t leefste oet in häör eige dialek. Mit Oet ’t Hert laote v’r zeen det ‘t Limburgs laef en neudige v’r ederein oet óm dao zelf óngerdeil van te zeen,” zaet Bert Mennings, directeur van ‘t Limburgs Museum.
Laevend erfgood
Mit Oet ’t Hert óngersjtreep ‘t Limburgs Museum ‘t belang van ‘t Limburgs as laevend cultureel erfgood mit ‘n plek wo de taal neet allein waert bewaard, maar ouch waert gebroek en doorgegaeve. Mit Oet ’t Hert laote v’r zeen det ‘t Limburgs laef en neudige v’r ederein oet óm dao zelf óngerdeil van te zeen.”
Oet ’t Hert is vanaaf 10 juli 2026 gratis te bezeuke in de foyer van ‘t Limburgs Museum.